Синоќа во Белград, Нови Сад и неколку други места дојде до судири помеѓу полицијата и демонстрантите, кои се собраа пред канцелариите на СНС и нејзиниот коалициски партнер во владата, СПС.
Поддржувачите на СНС, вооружени со палки, фрлаа ракети и огномет врз антивладините демонстранти во Нови Сад, а во новиот дел на Белград, полицијата употреби солзавец за да ги растера собраните пред канцелариите на владејачката партија.
Антивладините демонстранти прво се собраа пред седиштето на СНС во Нов Белград, а потоа група одеднаш се упати кон просториите на истата партија недалеку, поставувајќи контејнери и блокирајќи ги улиците.
Потоа полицијата се групираше и дојде во просториите на СНС и, употребувајќи солзавец, ја растера групата демонстранти, по што дојде до неколку блиски пресметки.
Пред полициските кордони, демонстрантите скандираа слогани против српскиот претседател и владејачкиот режим.
Многумина ја критикуваа полицијата за „заштита на криминалци и крадци“ и ги прашаа: „Дали знаете кого штитите?“
Во Ниш, Смедерево, Крагуевац, Краљево, Панчево и други градови, полициски кордони го обезбедуваа седиштето на СНС, пред кое имаше повремени тепачки со демонстрантите.
Тензично беше и во центарот на Белград, во близина на српскиот парламент, каде што Александар Вучиќ им се придружи на поддржувачите на СНС во текот на вечерта.
Во шаторскиот камп на поддржувачи на СНС во паркот Пионирски, подигнат минатата зима, Вучиќ, опкружен со обезбедување, се обрати на толпата, а таму беше и неговиот брат Андреј Вучиќ, кој дојде придружувн од група луѓе, објави телевизијата Н1 .
Вучиќ тврди дека во немирите биле повредени 16 полицајци, како и „64 повредени граѓани во просториите на СНС“.
Тој не спомена никаков напад инициран од поддржувачи на СНС, кои синоќа пукаа со разни пиротехнички средства кон граѓаните кои протестираа пред простории на СНС во градови низ цела Србија.
Српскиот претседател нагласи дека „нема да има граѓанска војна“ и повика на разговор. Ги обвини демонстрантите дека „се организираат за тепање и убивање“ на политички неистомисленици.
„Не ни помисливме да ја извадиме војската и нема потреба. Нема да има граѓанска војна. Ги поканувам да седнат и да разговараат“, рече Вучиќ.
Не е познато колку демонстранти биле приведени.
На повик на студентите, антивладините демонстранти излегоа на улиците во неколку градови во Србија за да протестираат против, како што рекоа, насилството врз демонстрантите во Врбас во Бачка Паланка еден ден претходно, на 12 август, од каде што инсерти покажуваат дека поддржувачите на владата и симпатизери на СНС фрлаа факели, камења и шишиња кон демонстрантите кои одговорија со разни предмети.
Опозициското движење „Крени-Промени“ соопшти дека поддржувачите на Вучиќ се одговорни за судирите. „Нападите врз луѓе со пиротехнички средства го нарушуваат нивното право на живот и протест“, се вели во соопштението.
Протестите против корупцијата ја потресуваат Србија од 1 ноември 2024 година, кога се урна бетонска настрешница на железничката станица во Нови Сад, и загинаа 16 луѓе.