САД ќе преземат дополнителни чекори за казнување на корумпираните функционери, изјави заменик-помошникот државен секретар за Западен Балкан Габриел Ескобар на настанот посветен на евроатлантската иднина на регионот во Атлантскиот совет во Вашингтон, пренесе Гласот на Америка.
„Не само што е ефективно да се санкционираат поединци, туку ако погледнете дел од она што го објавува Министерството за финансии, ќе ја видите длабочината на корупцијата“, рече Ескобар.
Тој го истакна примерот во Босна и Херцеговина, каде што политичарите активно се координираат и соработуваат со организираните криминални групи.
„И луѓето треба да го знаат тоа. Штом луѓето го знаат ова, лидерите мора да преземат акција за да ги отстранат овие луѓе од одговорните позиции. Треба да ги тргнат од партиските листи. И ова се однесува на сите земји во регионот“, рече тој.
Според Ескобар, корупцијата е закана за демократијата во регионот и мора да се изврши притисок врз лидерите да направат реформи во владеењето на правото неопходни за влез во Европската унија.
„Корупцијата е најголемиот проблем за регионот. Многу е јасно дека најнационалистичките партии во регионот се и најкорумпирани. И тоа е факт. Американската влада не го кажува тоа. Тоа го кажуваат независни организации како Транспаренси Интернешнл и некои наши европски граѓански организации кои постојано го истакнуваат тоа, вклучително и некои многу добри локални граѓански организации“, рече Габриел Ескобар.