Европската унија (ЕУ) е “екстремно загрижена” по апсењето на прокурдските лидери и пратеници во Турција.
Шефицата на европската дипломатија Федерика Могерини утринава излезе во јавност за да ја соопшти загриженоста на целиот блок и додаде дека е во контакт со Анкара:
“Ние сме екстремно загрижени поради апсењата и во контакт сме со властите”, напиша Могерини на Твитер.
Уапсени се повеќе пратеници од прокурдската партија која е трета политичка сила во земјата.
Могерини прецизираше дека свикала состанок на сите ЕУ амбасадори во Анкара но нема детали кога тој состанок ќе биде одржан.
Селатин Демиртас и Фиген Јуксекдаг, лидери на прокурдската партија Демократска партија на народите, беа уапсени заедно со други пратеници од истата партија. Според властите, уапсени се во рамките на антитерористичката истрага поврзана со Партијата на работниците на Курдистан (ПКК) и во контекст на чистката на опозиционерите на турската влада во вонредната состојба која беше воведена по јулскиот пуч.
Неколку часа во апсењето во близина на една зграда на полицијата во Дијарбакир на југо-истокот на Турција експлодираше бомба во која едно лице загина а 30 се ранети. Властите на Дијарбакир ја обвинија ПКК за нападот.