Од следната недела земјите членки на ЕУ ќе дозволат влез за патници од Македонија со потврда за вакцинација или PCR тест, дознава НоваТВ.
По надолниот тренд на ширење на коронавирусот, земјите на ЕУ почнаа да ги креваат рампите за влез.
Како што претходно јави ДПА, Европската унија треба постепено да ги олесни корона ограничувањата за влез за патниците од САД и седум други земји по договорот од средата меѓу 27-те земји-членки.
Патниците од САД, Албанија, Хонг Конг, Либан, Макао, Македонија, Србија и Тајван треба полесно да влегуваат во Унијата, изјави португалското претседателство со ЕУ за германската агенција.
Меѓутоа, останува на секоја земја-членка на ЕУ да одлучи точно кои барања им ги наметнува на патниците. Треба да се прецизира и кога точно ќе се спроведат новите аранжмани за патувања.
На почетокот на пандемијата, сите земји на ЕУ, освен Ирска, забранија несуштинско патување, освен во одредени околности. Државите што не се членки на ЕУ, Норвешка, Лихтенштајн, Швајцарија и Исланд, исто така учествуваа во забраната за влез.
Осумте новоодобрени држави од амбасадорите на ЕУ за послободно патување се приклучуваат кон веќе олабавените Австралија, Израел, Јапонија, Нов Зеланд, Руанда, Сингапур, Јужна Кореја и Тајланд.
Одлуката треба и официјално да биде усвоена до крајот на неделава, наведе портпаролот на португалското претседателство со ЕУ, пренесе ДПА.