Шефот на дипломатијата на Европската Унија (ЕУ), Жозеп Борел денеска изрази шок и згрозеност од убиството на Џорџ Флојд во САД, оценувајќи дека тоа е резултат на злоупотреба на моќ. Борел, како што пренесува „Дојче Веле“, рече дека полицајците не смеат да ги „користат своите овластувања на начин на кој тоа беше сторено во многу несреќната смрт на Џорџ Флојд, тоа е злоупотреба на моќта и тоа мора да биде осудено“.
Тој потенцираше дека Европејците „го поддржуваат правото на мирен протест, но исто така го осудуваат насилството и расизмот од секој вид и повикуваат на де-ескалација на тензиите“.
Шефот на германската дипломатија Хајко Мас ги оцени протестите во САД, по убиството на Флојд, како „разбирливи и повеќе од легитимни“.
„Можам само да изразам надеж дека мирните протести нема да продолжат да водат кон насилство, но уште повеќе изразувам надеж дека овие протести ќе имаат ефект врз САД“, истакна Мас.
Мас порача и дека на новинарите мора да им се овозможи слободно да ја вршат својата работа, критикувајќи го насилството врз нив, откако пред два дена во Минеаполис полицијата нападна екипа на Дојче веле, пукајќи врз новинарот со гумени куршуми.