Кошаркарите на Реал Мадрид се први учесници на Фајналфор турнирот во Евролигата што ќе се одржи во Виторија од 17 до 19 мај. „Кралевите“, кои патем се и актуелни шампиони на континентот, со 3:0 ја добија четвртфиналната серија со Панатинаикос, откако и вечерва во Атина го совладаа грчкиот состав со 89:82 (по четвртини: 23:18, 13:23, 22:17, 31:24).
„Зелените“ го решија во своја корист првото полувреме со пет коша разлика, благодарение на серијата со 11:0 од 16-та до 19-та минута. Гостите од Мадрид ја стопија негативата и во егал ситуација се влезе во завршните десет минути. Неизвесност беше присутна до самата завршница, а одлучувачка за победникот беше тројката на Кампацо во последната минута при водство на Реал М. со 78:74.
Кампацо и Руди Фернандез беа први стрелци во тимот од Мадрид. Двајцата уфрлија по 16 коша, Рендолф додаде 14, а Ајон заврши со 12. Најефикасен во поразената екипа беше Калатес со 17 поени.
Фенербахче, пак, поведе со 2:1 во четвртфиналтната серија со Жалгирис по триумфот во Каунас со 66:57 (по четвртини: 15:19, 16:15, 18:12, 17:11). Марко Гудуриќ со 17 коша и Јан Весели со 10 беа најзабележителни во составот од Истанбул, Нејт Волтерс беше лидер во тимот на Шарунас Јасикевичиус со 15 поени. Четвртиот меч во серијата е, исто така, во Каунас во четврток од 19 часот.
Евролига, четвртфинале
Панатинаикос – Реал Мадрид 82:89 (резултат во серијата 0:3)
Жалгирис – Фенербахче 57:66 (1:2)