Филип Лазаров имаше задоволителен настап во мечот против Бахреин што Македонија го доби со 28:23 во „Олимпијахале“ во Минхен. А, имаше и што да каже во микс зоната по вториот настап на националниот тим на Светското ракометно првенство во Германија и во Данска. Играчот на Ратинген ја истакна играта во одбрана како пресудна за конечниот резултат на сметка на фазата во напад што продуцира многу грешки и избрзани удари кон противничкиот гол.
„Одбраната го доби дуелот. Бахреин се мачеше цело време во напад освен при шутеви што реално тешко се бранат. Од Јапонија примивме 29 гола за што наидовме на забелешки. Во вториот меч на СП дозволивме шест помалку со тоа што последните 10-15 минути се играше порелаксирано“, изјави помладиот од браќата Лазарови.
Македонија ќе има некој час повеќе од едно деноноќие за рекуперација и подготовка за наредниот натпревар на мундијалот. Мечот со Хрватска е закажан за утре попладне (18 ч.), а момент плус што може да оди во полза на составот на Раул Гонзалез е фактот дека „коцкестите“, пак, ќе имаат некој час помалку со оглед дека излегоа на терен со Јапонија во „Олимпијахале“ по македонската средба со вицепрвакот на Азија.
„Дуелот со Хрватска е најважен за нас на овој турнир. Тоа ќе биде прилика да видиме до каде сме и колкава ни е силата во моментов. Хрватска е фаворит и за нијанса е посилна. Има поширок ростер, подолга клупа и, можеби, поискусни и поквалитетни поединци. Но, на терен ништо не се знае и ќе чекаме наша шанса. Имаме квалитет да одиме на победа на секој натпревар“, истакна Лазаров и притоа ја нагласи минутажата што помладите ја добија против Бахреин како и можноста за штедење на силите кај поискусните бидејќи и резултатот остави простор за тоа.
Левиот бек на националниот тим порача дека калкулациите не се предмет на размислување. Пред ракометарите се три меча во кои не се фаворити што беше случај во претходните два и на Хрватска, на Шпанија и на Исланд ќе се пристапи без задршка, па што биде нека биде. Калкулантски однос, според Филип Лазаров, не постои во спортот и како што заклучи и самиот „знаејќи го селекторот, Македонија ќе оди на победа на секој меч до крај“.