Британскиот весник „Фајненшел Тајмс“ објави текст за самитот во Берлин што го наслови со „Ладен туш на Франција и на Германија за надежите на Балканот за брзо пристапување во ЕУ“. Авторот наведува дека германската канцеларка Ангела Меркел и францускиот претседател Емануел Макрон им навестија на лидерите на земјите од регионот за малите шанси за влез во блокот и им порачаа за тоа време „да ги средат работите дома“.
Весникот наведува дека Макрон бил фокусиран на неопходноста од „политичка стабилност“ во регионот. Францускиот претседател притоа порача дека Париз стои на располагање за клучните економски, социјални и безбедносни реформи како и реформите во областа на владеење на правото пред да отпочне процесот на проширување на ЕУ. „Фајненшел Тајмс“ потсетува дека ЕУ веќе долго време говори за можноста за влез на земји од Западен Балкан во Унијата со цел поттикнување на економскиот напредок и подобрување на пошироката регионална стабилност.
Врз основа на оценки на аналитичари, британскиот весник пишува дека Меркел и Макрон биле домаќини на самит поради загриженост за развој на настаните во регионот и покрај, како што се наведува во текстот, успехот без преседан во врска со постигнатиот договор за името меѓу Македонија и Грција.
Во врска со косовското прашање се подвлекува противењето на Меркел за било какво решение меѓу Белград и Приштина што ќе опфаќа размена на територии што, потенцира весникот, го поддржуваат Брисел и Вашингтон.
Самитот во Берлин, пишува „Фајненшел Тајмс“ се организира во момент на „вклучен аларм“ во Брисел поради се поголемите улоги на Русија и на Кина на Западниот Балкан. Макрон во тој контекст, како што се наведува, рекол оти разбира дека и други актери „имаат свои интереси на Балканот, но и оти европските интереси за поважни“.