Главниот медицински советник во Белата куќа, Ентони Фаучи предупреди дека слабеењето на ефектот на вакцините во комбинација со високо преносливата Делта варијанта на коронавирусот ќе доведе до двоен удар, што ќе ги погоди и вакцинираните луѓе.

Малку вознемирувачки аспект од ова е тоа што ако го задржите нивото на динамика на вирусот во заедницата на високо ниво, очигледно луѓето кои се најранливи се невакцинираните. Но, кога имате вирус кој се пренесува како делта, во контекст на слабеење на вакцината, таа динамика негативно ќе влијае дури и на вакцинираните луѓе. Значи, тоа е двоен удар. Ќе има зголемување на бројот на заразени меѓу вакцинираните, што ќе биде поголем од сега, рече тој на самитот СТАТ 2021.

Неговото негативно предвидување е во согласност со предупредувањата на другите експерти кои го најавуваат новото ширење на ковид-19, бидејќи сè повеќе луѓе ќе минуваат време во затворени простории како што се наближуваат празниците.

Националниот дневен просек на нови случаи се искачи на повеќе од 80.000, според федералните податоци, што е највисока стапка за скоро еден месец. Вкупно 40 американски држави во моментот покажуваат висока стапка на инфекција, а вкупниот број на хоспитализации се зголеми за првпат во речиси 10 недели.

Не само што ќе биде важно да се убедат приближно 60 милиони невакцинирани луѓе дека треба да се имунизираат, туку е многу важно „да се спроведе програма за третата доза од вакцината“, рече тој.

Фаучи додаде дека дополнителните дози на вакцината против ковид-19 би можеле да станат стандард за „целосна“ вакцинација. Изјавите на Фаучи дојдоа во време кога сè поголем број држави и локални власти вршат притисок за продолжување на задолжителната вакцинација на трета доза.

Нивната цел е да ја воведат третата доза за сите возрасти најмалку шест месеци по втората вакцина на „Фајзер“ или „Модерна“.