Избори се ближат во Холандија, Франција и Германија. Три големи и значајни земји на ЕУ кои не би сакале на изборите да им се повтори велешко-американскиот пример на лажни вести.
Така осум француски медиуми, на кои ќе им се придружат германски и холандски колеги, одлучија да влезат во соработка со Фејсбук за да го редуцираат бранот на лажни вести.
Соработката со француските медиуми ја најави самиот Фејсбук.
Фирмата е под притисок на јавноста која бара социјалната мрежа да се бори против лажните вести. Многумина во САД сметаат дека својата победа на изборите Доналд Трамп им ја должи делумно и на лажните вести кои, помеѓу другото, доаѓаа и од нашиот Велес.
Конкретно, проектот предвидува платформа слична на таа што беше иницирана во декември во САД со пет американски медиуми – ABC News, AP, FactCheck.org, Politifact и Snopes.
По Франција се најавува дека Германија и Холандија ќе влезат во истиот проект.
Оваа платформа им дозволува на корисниците да ја следат веста се до нејзиниот извор и ако сметаат дека е лажна да ја пренесат на платформата. Медиумите кои учествуваат во проектот потоа можат да ја поверат веста.
Доколку утврдат дека е лажна медиумите и тоа го докажат со линк, веста во тој случај ќе се појави кај корисниците за социјалните медиуми со посебна ознака која означува дека е лажна. Во моментот кога корисникот ќе сака да ја сподели веста на својот профил ќе му се појави напомена да внимава.