Меѓународната фудбалска федерација (ФИФА) порача дека не постојат „значителни оперативни препреки“ за укинување на четири децении старата одлука за забрана на Иранките да присуствуваат на фудбалски натпревари. Ваквиот заклучок на централата во Цирих доаѓа по инспекција на нејзина делегација во Иран и верува дека вратите на стадионот во Техеран ќе бидат отворени за припаднички на понежниот пол на 15 октомври кога националниот тим ќе игра против Камбоџа во квалификациите за Светското првенство во 2022 година.
Иранскиот министер за спорт, Масуд Солтанифар во четвртокот изјави дека на иранските жени ќе им биде дозволено да одат на стадиони и да ја гледаат машката фудбалска репрезентација.
„Направени се сите неопходни подготовки за жените да можат, првично само за меѓународни натпревари, да влезат на фудбалските стадиони“, истакна Солтанифар.
На стадионот „Азади“ во Техеран, каде репрезентацијата на Иран најчесто ги игра своите мечеви како домаќин, подготвени се одделни влезови, трибини и тоалети за жените. Исто така, ќе има дополнителен број на полицајци за жените да можат безбедно да влезат и да излезат од стадионот, додаде Солтанифар.
На жените во Иран веќе четири децении им е забрането да присуствуваат на фудбалски натпревари. Една жена неодамна почина откако се самозапали во знак на протест поради тоа што и беше изречена затворска казна за обид за гледање клупски натпревар.