„Утрово го посетив Иван. Тој е буден и се чувствува добро. Изрази огромна благодарност до семејството Диневи, докторите и целата јавност за поддршката што ја добива. По успешната операција следува најважниот период од неговото закрепнување, периодот во кој телото на Иван треба да го прифати новиот орган. Докторите максимално посветено ќе го водат низ овој процес, да им посакаме среќа на сите. Верувам дека овој историски подвиг на македонското здравство, овој највисок акт на човечност и хуманост, ќе ја подигне свеста за органодарителството и ќе имаме уште многу успешни трансплантации“, напиша Филипче на Фејсбук.
Во раните утрински часови во петокот, околу 02 часот по полноќ започна да чука првото трансплантирано срце во градите на 54 годишниот Иван Огненовски. Операцијата траеше шест часа и заврши успешно, па лекарскиот тим го разбуди првото трансплантирано срце во земјава во период кога здравството се соочува со пандемија од коронавирус.
Зафатот беше извршен на Државната кардиохирургија со учество на заеднички тим од кардиохирурзи под водство на Сашко Јовев (Државна Кардиохирургија), Жан Митрев (Клиника „Жан Митрев“) и Александар Николиќ (Клиника „Систина“) и Маја Мојсова анестезиолог (КАРИЛ).
Ова немаше да биде успешно доколку не постоеше семејството Диневи од Стар Дојран што со голема емоција ги даруваше органите, срцето на нивната најмила Емилија чука во градите 54-годишниот Иван Огњановски, а двата бубрега се трансплантираа кај двајца пациенти со хронична бубрежна слабост кои со години беа на дијализа.