Шпанската полиција уапси 12 лица и трага по уште толку, откако група на патници побегна од авион на аеродромот во Палма де Мајорка.

Авионот на нискобуџетната мароканска компанија „Ер Арабија Марок“, кој летал од Казабланка до Истанбул, принудно слетал на Мајорка поради, наводно болен патник, соопшти шпанската цивилна гарда.

Кога се отвориле вратите на авионот вчеравечер во 20:30 часот по локално време, 21 патник избегал од авионот, соопштија денеска од регионалната Влада. Меѓу 12-те уапсени имало и еден болен патник кој подоцна бил пуштен од болница. Едно лице, пак, е уапсено поради агресивно однесување во леталото.

Портпаролката на регионалната Влада, Аина Калво соопшти дека не е невообичаено авиони да побараат дозвола за принудно слетување, но дека не е нормално „група патници да реши да не почитува меѓународни правила“.

Полицијата истражува зошто патниците се дале во бегство, поточно дали станува збор за оркестриран план или изолиран инцидент, рече портпаролката и најави дека патниците ќе бидат вратени во нивната татковина, бидејќи илегално влегле во Шпанија.

Поради инцидентот, аеродромот во Мајорка бил затворен повеќе три часа, а авионите во тој период биле пренасочувани кон алтернативни аеродроми, како оние во Барселона, на Ибица и во Менорка.