Франција е на нозе. По вчерашната прослава на падот на Бастилја, Французите денеска ја слават втората светска шампионска титула во фудбал. Патот до неа на мундијалот во Русија одеше преку Австралија (2:1), Перу (1:0) и Данска (0:0) во групната фаза, Аргентина (4:3) во осминафиналето, Уругвај (2:0) во четврт-финалето, Белгија (1:0) во полуфиналето и Хрватска (4:2) во големото финале.
Преку 90.000 парижани се собраа под отворено небо за време на мечот за трофејот во Москва додека Ајфеловата кула беше затворена за посетители. Последниот свиреж на аргентинскиот арбитар Ектор Питана беше дочекан со голем огномет во француската престолнина како знак за почеток во еуфоријата во која потона целата земја.
На автопатот околу Париз за кратко време се создаде километсрака колона со возила во боите на француското знаме. Сирените се отповаруваат до заглушување, на улиците се пее, се игра во ноќта што ќе биде долга без разлика на работниот ден што следува. Властите притоа распоредија 110.000 полицајци низ цела Франција и апелираа дека безбедноста зависи и од нивното однесување, а не само од припадниците на безбедносните служби.
Францускиот претседател Емануел Макрон го следеше финалето на СП од ложата на стадионот „Лужники“ во друштво на неговата хрватска колешка Колинда Грабар-Китаровиќ, рускиот претседател Владимир Путин, првите луѓе на ФИФА (Џани Инфантино) и на УЕФА (Александар Чеферин).
Пред почетокот на средбата, Макрон имаше средба со неговиот руски домаќин Путин на кого му испорача пофалби за одлично организираниот мундијал и во шега му порача дека е дојден по шампионскиот трофеј.