Пелистер го совлада Работнички 1:0 во дербито на колото на „Телеком арена“. Лукас Кардосо во 87 минута се впиша во листата на стрелци за шеста победа на битолчани во сезоната што ги искачи на третото место на табелата. Тимот од Дебар маало промаши пенал во првото полувреме. По стартот на Мишевски врз Силјановски, главниот судија Димитар Мечкаровски покажа на белата точка, но најстрогата казна во гол не успеа да ја претвори Бојан Најденов. Во вториот дел домашните се заканија и преку Елмас и Суад Сахити чии промашувања во финишот ги казни Бразилецот во дресот на „зелените“.
Вардар и Шкендија ги делат седум бода и по мечевите од 13. коло во домашниот фудбалски шампионат. И лидерот и првиот по него на табелата освоија три бода на противнички терен попладнево. За прволигашкиот викенд да мине во знак на гостинските екипи е погрижија и Пелистер и делумно Силекс. Честа на домашните ја одбрани само Ренова.
Бранителот на титулата Вардар ја совлада Брегалница во Кочани со 1:0. Единствениот погодок го постигна Новак во 64 минута. Вицешампионот, пак, со 2:1 ја порази Победа во Битола. Жуниор во 4 минута и Бесарт Ибраими во 48 минута погодија за тетовските „црвено-црни“, почесниот за прилепчани беше дело на Шаркоски во 40 минута. Наумоски и Цуцули беа исклучени во судиското продолжение.
Еден гол за три бода им беше доволен и на фудбалерите на Ренова во дуелот со Шкупи. Трите бода на контото на „гипсарите“ ги додаде Рамадани во 81 минута.
По бод поделија Македонија и Силекс во Ѓорче Петров. Костовски во 55 минута реализира за водство на домашните што го анулира Пановски во 78.
Следува пауза во домашниот шампионат поради настапот на репрезентацијата на Македонија против Шпанија во квалификацииите за СП 2018, средбите од 14 коло се закажани на 16 ноември.
Прва лига, 13. коло
Резултати
Брегалница – Вардар 0:1
Работнички – Пелистер 0:1
Македонија Ѓ.П. – Силекс 1:1
Ренова – Шкупи 1:0
Победа – Шкендија 1:2
Табела: Вардар 31, Шкендија 24, Пелистер 22, Работнички 20, Ренова 19, Силекс 15, Шкупи 14, Победа 10, Македонија Ѓ.П. 10, Брегалница 8.
Идно коло: Вардар – Македонија Ѓ.П., Шкендија – Брегалница, Пелистер – Ренова, Силекс – Работнички, Шкупи – Победа.