Се бистри ситуацијата во домашниот фудбалски шампионат по мечевите од 25 коло. Вардар направи голем исчекор кон нова титула што, пак, станува далечна за Шкендија, а значајни, ако не и пресудни, три бода за Европа освои екипата на Работнички. Дното на табелата без позначајни поместувања освен доближувањето на Брегалница до Македонија Ѓ.П., две екипи што во наредната сезона, најверојатно, ќе бидат нови второлигаши.
Вардар ја совлада Ренова со 1:0, резултат со кој и Работнички ја доби Шкендија, па разликата меѓу скопските црвено-црни и тетовци сега изнесува девет бода во корист на тимот на Гоце Седлоски. Дејан Блажевски во 73 минута погоди за бранителот на тронот на гостувањето против составот од Џепчиште, капитенот Душко Трајчевски, пак, го постигна единствениот гол за дебармаалци на „Телеком арена“ против вицешампионот.
Во прилог на Работнички беше исходот во Охрид меѓу Пелистер и Силекс што заврши 0:0. Екипата од Градски парк има пет бода повеќе од битолчани во трката за третото место што води во кваификациите за Лига Европа. Голови немаше ниту во Ѓорче Петров во дуелот меѓу Македонија и Победа додека Брегалница ја забележа, само, втората победа во сезоната. Во Штип беше совладан Шкупи со 3:0 со погодоците на Наумов во 17 минута и во 44 минута и на Здравков во 26 минута од пенал.
Прва лига, 25 коло
Резултати
Ренова – Вардар 0:1
Работнички – Шкендија 1:0
Пелистер – Силекс 0:0
Македонија Ѓ.П. – Победа 0:0
Брегалница – Шкупи 3:0
Табела: Вардар 59, Шкендија 50, Работнички 42, Пелистер 37, Силекс 35, Ренова 31, Шкупи 25, Победа 22, Македонија Ѓ.П. 17, Брегалница 16.
Идно коло (9 април): Вардар – Пелистер, Шкендија – Ренова, Победа – Работнички, Шкупи – Силекс, Брегалница – Македонија Ѓ.П.