Вкупно 28 лица се најдоа на тапет кај грчките органи на прогонот за лажирање на фудбалските мечеви. Дел од нив се поранешни официјални лица во клубовите и во телата на Федерацијата, а дел се активни чинители во најважната споредна работа во светот. Меѓу нив и Вангелис Маринакис (50), сопственик на екипата на Олимпијакос која учествува во групната фаза на Лигата на шампиони, а од мај оваа година и на Нотингем Форест.
Првиот човек на „црвено-белите“ од Пиреја, инаку бродски магнат, ги негира обвинувањата. Неговиот адвокатски тим успеа да издејствува симнување на четири точки по кои се товареше, но судот, сепак, реши да му суди за местење.
Управувањето со Олимпијакос го презема потпретседателот на клубот, Јанис Моралис кој ќе биде на функцијата додека трае постапката против Маринакис.