Белгија е шести четвртфиналист на Светското фудбалско првенство. „Црвените ѓаволи“ беа на работ на елиминација во дуелот со Јапонија, имаа 0:2 во 52. минута, но Роберто Мартинез ги погоди двете замени што на крај му донесоа пресврт за конечни 3:2 и опстанок на мундијалот во Русија.
Харагучи во 48. минута и Инуи во 52. минута обезбедија водство за „самураите“ како најава за изненадување на „Ростов арена“. Но, сликата се смени со влегувањето во игра на Маруан Фелаини и Насер Чадли. Најпрво намали Јан Фертонген во 69. минута за играчот на Манчестер јунајтед, пет минути подоцна, да израмни на 2:2. И само што се доби впечаток дека сме на праг на нови продолженија, можеби и пенали, во нокаут фазата на СП, Јапонците доживеаја шок.
„Самураите“ добија корнер во судиското надополнување, се преселија во поголем број во казнениот простор на Тибо Куртоа во обид да зададат решавачки удар. Но, Белгијците изведоа молскавична контра што во гол за четврт-финале ја претвори Чадли за тежок удар за јапонската селекција и нејзините навивачи на трибините.
Белгија во четврт-финалето ќе игра против Бразил кој претходно ја оправда фаворитската улога во натпреварот со Мексико и со головите на Нејмар и на Фирмињо славеше со 2:0.
Белгија – Јапонија 3:2 (0:0)
Стадион: „Ростов арена“ во Ростов на Дон. Гледачи: 41.466. Гл. судија: Маланг Диедиу. Асистенти: Џибрил Камара и Ел Хаџи Самба (сите тројца од Сенегал). Ж. картони: Шибасаки (Јапонија). Стрелци: Фертонген 69’, Фелаини 74’, Чадли 90’+4’ за Белгија; Харагучи 48’, Инуи 52’ за Јапонија.
Белгија (формација 3-4-3): Куртоа – Фертонген, Компани, Алдерверлд – Караско (Чадли 65’), Витсел, Де Брујне, Муние – Азар, Мертенс (Фелаини 65’), Лукаку. Селектор: Роберто Мартинез.
Јапонија (формација 4-2-3-1): Кавашима – Нагатомо, Шоџи, Јошида, Сакаи – Шибасаки (Јамагучи 81’), Хасебе – Инуи, Харагучи (Хонда 81’), Кагава – Осако. Селектор: Акира Нишино.