Новак Ѓоковиќ го призна поразот (3:6, 4:6) од Енди Мареј во финалето на Мастерсот во Лондон. Во изјава по мечот истакна дека загубил од најдобриот тенисер на планетата во моментот, но при кусата ретроспектива не изрази жалење бидејќи во изминатите 12 месеци стигна до трофејот на Ролан Гарос, единствениот гренслем турнир што недостасуваше во неговата колекција.
„Извонредна година. Можам да бидам горд на првите шест месеци, денеска сме дел од историја. Чест и задоволство е да се учествува на ваков настан. Енди сега и дефинитивно е број еден, одигра одличен тенис и ја заслужи победа вечерва. Јас се подобрував како што одминуваше времето, но очигледно доцна се разбудив“, изјави Ѓоковиќ при поделбата на пехарите во „О2 арена“.
На џентлменскиот однос на Ѓоковиќ возврати и Мареј со иста мера по директната пресметка за светскиот тениски трон.
„Ова е посебен ден за мене по толкуте финални мечеви на гренслем турнирите против Ѓоковиќ. Ова ривалство е тешко за мене по сите тие порази во минатото. Затоа и не очекував дека вакво нешто е можно да се случи“, го почна своето обраќање најдобриот светски рекет за 2016 година и продолжи:
„Кога загубив од Ѓоковиќ во финалето на Роланс Гарос, тој држеше четири гренслем трофеи во раце. Тоа е неверојатно достигнување што долго нема никој да го повтори“