„Северна Македонија и Албанија направија голем исчекор напред во исполнување на сите најважни критериуми за членсво во ЕУ и го очекуваме моментот кога ќе бидат отворени, што поскоро, пеговорите со Унијата“. Ова го истакна Гордан Грлиќ Радман, министер за надворешни работи и европски прашања од Република Хрватска пред денешниот Совет на министри во Луксембург. Тој рече дека, кога станува збор за проширувањето може да се пофали напредокот на земјите кои се на патот кон ЕУ.
Тој најави дека денеска ќе се одржат две меѓувладини конференции по новата методологија, со Србија и со Црна Гора, но без отворање или затворање на поглавјата. Во однос на Косово, Радман смета дека за Косово треба да се донесе итна одлука за визна либерализација.
Хрватскиот министер посочи дека фокусот на разговорите, за време нна министерскиот совет, ќе биде ставен на илегалната миграција.
– Кога е во прашање миграцијата, она што е важно да се истакне тој постојан притисок на т.н. Западна Балканска рута, тоа е наша главна грижа со која мора да се соочиме заедно со нашите партнери од ЕУ, истакна Грлиќ Радман.
Во однос на кандидатскиот статус на Босна и Херцеговина, Радман вели дека се уште треба да бидат исполнети 14 критериумикои се неопходни за членство во Унијата, а како главен недостаток ги посочи неопходните измени во Изборниот закон со цел да се обезбеди рамноправност помеѓу трите конститутивни народи, Бошњаците, Србија и Хрватите.
Клус: Блокадата за С.Македонија го доведува во прашање кредибилитетот на ЕУ
Најавувајќи го одржувањето на двете меѓувладини конференции со Србија и Црна Гора во доцните попладневни часови, словачкиот заменик минситер за надворешни работи, Мартин Клус, истакна дека проширувањето на ЕУ е многу важна тема за официјална Братислава.
– Многу искрено разговараме за тоа како да го одблокираме процесот со Северна Македонија и со Албанија. Навистина се надевам на добри резултати и позитивни одговори, бидејќи од тоа зависи кредибилитетот на Европската Унија и на тој регион, што уште еднаш ќе повторам, е многу важен за нас, рече Клус.
Биљана Божиновска