Ќе успее ли Вардар да се издигне над турбуленциите во кои западна клубот во изминатите денови? – Дали најавата за повлекување на спонзорот Сергеј Самсоненко, оставката на тренерот Гоце Седлоски и заминувањето на напаѓачот Џонатан Боарето ќе успее да ги направи посилни „црвено-црните“ или ќе се одрази врз нивната игра? – Жешкиот костен сега е во рацете на Чедомир Јаневски кој ќе мора да амортизира со внесување на свежина во играта и со резултати. Зад себе има само два тренинга со екипата, синоќа беше промовиран за нов кормилар, а веќе вечерва (20 ч.) ќе ја предводи екипата на „Телеком арена“ против Фенербахче во првиот плеј-оф дуел за Лига Европа (ЛЕ) на УЕФА.
„Фенербахче е голем клуб во Турција. Ќе биде умешност да се игра против него. Запознати сме со начинот на кој игра. Неопходна е голема борба. Неспорни се нивните исклучителни индивидуални способности. Вардар е пред шанса да покаже дека поседува квалитет и се што е потребно за успех и да стане прва екипа од Македонија во групна фаза во европско натпреварување“, истакна Јаневски.
Вечерашниот меч на Вардар ќе биде петти европски ова лето. Македонскиот првак почна во квалификациите за Лигата на шампиони (ЛШ), го елиминира Малме и беше елиминиран од Копенхаген. Токму минувањето на шведскиот состав во второто коло значеше уште најмалку четири настапи бидејќи поразените екипи во во третото во ЛШ се селат во плеј-офот во ЛЕ. Капитенот се надева во нова добра претстава на домашен терен што ќе значи и нова победа пред реваншот во Истанбул.
„Фенербахче е најдобрата екипа што гостувала во Македонија во последните неколку години. Екипа со голем број на индивидуалци кои со еден потег може да решат противник. Немаме пораз како домаќини во двата претходни меча, се надевам дека така ќе биде и во претстојниот. Ќе играме пред полни трибини, не се сомневам дека ќе имаме поддршка на што, верувам, ќе возвратиме со добра игра и со победа“, изјави капитенот Бобан Грнчаров.
Главен судија на вечерашниот натпревар ќе биде Италијанецот Лука Банти во чија ќе му асистирааат сонародниците Матео Пасери и Фабијано Прети.
Лига Европа/плеј-оф/први мечеви
Денеска играат
Динамо Загреб – Скендерберг
БАТЕ Борисов – Олександрија
Аполон – Митјиланд
Краснодар – Црвена звезда
Хафнарфјордур – Брага
ПАОК – Естерсунд
Вардар – Фенербахче
Викторија Плзен – АЕК Ларнака
Лудогорец – Судува
Алтах – Макаби Тел Авив
Панатинаикос – Атлетик Билбао
Легија Варшава – Шериф Тираспол
Домжале – Олимпик Марсеј
Ајакс – Розенборг
Виторул – Салцбург
Бриж – АЕК
Осиек – Австрија Виена
Милан – Шкендија
Партизан – Видеотон
Евертон – Хајдук
Маритимо – Динамо Киев