Прифатен е обвинителниот акт на Специјалното јавно обвинителство (СЈО) од страна на Судот за предметот „Титаник“, каде поранешните први луѓе на ВМРО-ДПМНЕ, вклучувајќи го и Никола Груевски, се обвинети за изборни измами.
„Советот за оценка на обвинителен акт при Основниот суд Скопје 1 – Скопје, кој постапува во оценка на обвинителниот акт на Специјалното јавно обвинителство, донесе решение со кое обвинителниот акт го одобри во целост“, соопшти Судот.
Во случајот „Титаник“ обвинети се вкупно 21 лице.
Освен Груевски, обвинети се и поранешниот шеф на неговиот кабинет, Мартин Протоѓер, поранешните министри Миле Јанакиески и Гордана Јанкулоска, поранешниот генерален секретар на владата и на ВМРО-ДПМНЕ, Кирил Божиновски.
Тие се товарат за злосторничко здружување, злоупотреба на средствата за финансирање на изборната кампања и повреда на избирачкото право.