Лидерот на ВМРО-ДПМНЕ Никола Груевски, придружуван од Никола Тодоров и Антонијо Милошоски денеска се сретнаа со Еврокомесарот за проширување и добрососедска политика, Јоханес Хан.
Како што информираа од партијата на средбата се разговарало за интеграциските процеси и за актуелните политички случувања.
„Претседателот на ВМРО-ДПМНЕ, Груевски истакна дека активностите кои се однесуваат на интеграциските процеси треба да се исполнат и дека ВМРО-ДПМНЕ ќе ги поддржи сите реформи за кои ќе цени дека се од интерес за граѓаните. Тој посочи дека главна цел на Владата на СДС не треба да биде само добивање на позитивен извештај, какви Македонија имаше пред политичката криза, туку позитивна препорака за почеток на преговори за членство во Европската Унија. Груевски истакна дека ВМРО-ДПМНЕ сака да ја види државата што поскоро како членка на Европската Унија и НАТО, што и впрочем и го заслужи, нешто што беше констатирано на самитот на НАТО во Букурешт во 2008-та година, како и во 2009-та година од страна на ЕУ. Доколку тогаш државата станеше членка на НАТО и започнеше разговори со Европската Унија многу од предизвиците со кои се соочи, немаше да се случат, додаде Груевски“, пишува во соопштението на партијата.
Од ВМРО-ДПМНЕ додаваат и дека на Хан му соопштиле неколку работи што ја загрижуваат нивната партија, како на пример генералниот реизбор на судии и промената на персоналниот состав на членови во Републичкиот судски совет.