По синоќешното интервју на лидерот на ВМРО-ДПМНЕ, Никола Груевски во кое повика да не се седи дома и народот на улица да ја спасува државата, бидејќи тој смета дека е нападната, се случија три инциденти на луѓе кои не се согласуваат со политиките на Груевски или се негови отворени критичари.
„Ако народот не си ја одбрани државата, тогаш ќе има проблеми. Ако сметаат и ако планираат со седење дома и гледање телевизија дека некој друг ќе ја одбрани државата, се во заблуда“, рече Груевски, повикувајќи го народот да ја покаже својата сила за како што вели тој, против двојазичноста, нападот на унитарноста и кантонизацијата.
Уметникот Златко Ориѓански, кој на социјалната мрежа Фејсбук не штеди зборови кога го критикува највисокото раководство на ВМРО-ДПМНЕ и отворено зборува за соживот помеѓу Македонците и Албанците, вели домот му бил излепен со специјално изработени двојазични пари, веројатно алудирајќи на неговото предавство кон земјава.
– Сношти некаде пред полноќ излегов да купам цигари. Кога се вратив назад, влезната врата од мојот стан беше сета излепена со налепници од овие таканаречени двојазични пари со некакви Албански херои, налепници со навредливи зборови за Албанциве, налепници некаде приготвени и отпечатени за таа цел. Повикав полиција и она што беше најкомично, едниот од полицајците што вршеше увид беше Албанец, та затоа прашувам, што требаше, да го избркам, да побарам да дојде некој друг? Полицијата беше апсолутно коректна и професионална. Цела среќа во сево ова е што не се сретнавме на скали со некој од разбојниците, но, некој се обидува да го турне населението во провалија, таа работа загрижува. Еден непромислен потег и сите ке завршиме во пекол, раскажува Ориѓански.
Кафе-барот „Излет“ пак, чиј сопственик беше во првите редови на Шарената револуција а воедно во неговиот објект се организираа акции за собирање средства за казнетите активисти од протестите кои се случуваа минатото лето, објави видео во кое се гледа дека искрешни се стаклата на „Излет“.
Утрово и пратеникот на СДСМ од Куманово, Максим Димитриевски се разбуди со вознемирувачки пораки пред својот дом. Како што објави тој, него го обвинуваат за „предавник“, бидејќи припаѓа на СДСМ, партијата која ги доби потписите од ДУИ по преговорите за платформата на албанските партии.
По синоќешното интервју, на социјалните мрежи исто така објавен е повик за т.н нов „Илинден“, од страна каде што најсвежата објава е од утрово. Во повикот се вели:
„Македонија е над сите интереси. Дојде време да го обзнаниме Четвртиот Илинден. Бараме ниту една политичка партија во Македонија да не ја потхранува и уважува дискриминаторската политика на одредени земји. Бараме ниту една политичка партија да не прифаќа платформи создадени за туѓи интереси, во туѓи држави, без изборен легитимитет чија цел е разнебитување на Македонија каква што ја знаеме“, стои во повикот меѓу другото.
Собирот насловен како „Црвената линија ја поминавте, црвено-жолтата не“ е закажан за денес во 17 часот пред објектот на Владата.