Косовскиот премиер во оставка Рамуш Харадинај изјави дека се повлекол од функцијата поради повикот на Специјалното обвинителство во Хаг, а не, како што кажа, притисокот од САД и ЕУ за ставовите што ги застапува во дијалогот со Белград.
„Јас ја исполнив законската обврска да се јавам на располагање пред Специјалното обвинителство како осомничен во истражна постапка. Дадов оставка на местото шеф на владата, а повикот сам по себе има политички импликации. Со оглед на тоа дека двапати се појавив на суд и дадов можност меѓународното правосудство да го преиспита тој период од војната во целина, бев многу изненаден од повикот“, рече тој во интервју за албанскиот сервис на Глас на Америка (ВОА).
На прашањето на ВОА дека повикот од Хаг дошол по негово одбивање да ги укине таксите од 100 отсто за сите производи од Србија , Харадинај кажа дека „на Косово постои сомнеж дека станува збор за завера“.
„Тоа што можам да го потврдам е дека верувам во политичките ставови кои ги изнесов на најискрен начин пред меѓународните партнери: границите на Косово се неспорни и нема дискусија за територија и граници, спогодбата со Србија треба да се постигне со взаемно признавање во постојните граници, бидејќи Косово не може да дозволи творби како што е републиката на Додик, тоа ја носи Русија на Косово. Тарифите се укинуваат со признавањето“, вели Харадинај.
Запрашан дали очекува нови избори, Харадинај одговори дека очекува тоа да се случи на крајот на септември или почетокот на октомври.