Холандскиот премиер Марк Руте ги нарече идиоти демонстрантите кои беснееја низ земја во текот на викенд во протестите против епидемиолошките мерки. Повеќе од 100 луѓе се приведени во трите ноќи на насилство, а полицијата во петокот пукаше во Ротердам.
Тоа беше чисто насилство маскирано како протест, рече Руте, коментирајќи ги најлошите немири околу затворањето од јануари.
Руте: Не прифаќам идиоти кои дивеат затоа што се несреќни
„Има многу немири во општеството, затоа што толку долго се бориме со бедата на короната. Но, никогаш нема да прифатам идиоти кои користат чисто насилство само затоа што се несреќни“, рече Руте.
Околу 30 лица беа приведени вчера и уште десетици пред два дена. Имаше и палења на огнови на улиците, а демонстрантите фрлаа камења. Во Хаг бил фрлен камен низ шофершајбна на амбулантно возило кое однело пациент во болница.
Насилството започна во петокот вечерта во Ротердам. Протестот против планот на владата да забрани пристап на јавни места за повеќето невакцинирани луѓе набрзо стана насилен. Иако одредени мерки за затворање беа повторно воведени во земјата на 13 ноември, дневниот број на заразени во текот на минатата недела се искачи на највисоко ниво од почетокот на пандемијата.