Властите на холандската централна покраина Утрехт ја отворија, како што велат, „најдолгата соларна патека за велосипеди во светот“, поврзувајќи на тој начин одржлив извор на енергија со превоз без загадување. Сефте на патеката долга 330 метри направија ученици од локално основно училиште во селото Мартенсдијк во околината на Утрехт.
Патеката се состои од блокови на готов бетон, прекриени со тенок проѕирен слој кој заштитува и воедно овозможува продор на сончева светлина до вградените соларни ќелии кои произведуваат струја.
Целта на проектот е да се утврди дали такви патишта со двојна намена може да се користат за добивање на струја, со користење на соларна енергија, но и да служи на велосипедисти, во настојувањата на покраината Утрехт да ја намали емисијата на јаглерод.
– Тоа е многу важно. Сакаме да бидеме климатски неутрални до 2040 година и затоа мора да користиме иновации, а ова е многу иновативно. Нашата покраина е многу густо населена, а просторот е мал, па затоа мора да се пробаме со двојна употреба. Значи, ако патиштата може да се користат за производство на енергија, тоа е двојна предност, рече Арне Шаделе, официјално лице од покраината Утрехт.
Соларната патека е отворена на денот во кој Европската Унија промовира нов обемен попис во насока на исполнување на ветувањето дека во текот на оваа деценија ќе ја намали емисијата на гасови кои предизвикуваат глобално затоплување за 55 отсто.