Претседателската гарда на Централноафриканската Република (ЦАР) отвори оган врз мировници на Обединетите нации (ОН) во главниот град и рани 10 од нив, потврди мисијата на ОН.

Мисијата на ОН соопшти дека во инцидентот кој „се чини како намерен и неоправдан напад“, во престрелка се ранети десет невооружени мировници на ОН од Египет, за што се одговорни членовите на претседателската гарда во главниот град на ЦАР.

Египетските мировници припаѓаат на мисијата на ОН во таа земја, а ОН соопштија дека мировните сили „без претходно предупредување биле под силен оган од претседателската гарда“. Во моментот на нападот, мировниците се упатиле кон нивната база со автобус со јасни знаци на ОН, а додека автобусот се обидувал да го напушти просторот во близина на претседателската резиденција, возилото удрило во жена која починала на лице место.

Инцидентот се случи во време кога растат тензиите и стравувањата од нов напад на бунтовниците во главниот град кои веќе се обидоа да го заземат Банги, главен град на ЦАР, во јануари, но беа одбиени од безбедносните сили по интензивните борби на периферијата на градот.

Мисијата на ОН моментно има повеќе од 12.000 воен и полициски персонал во ЦАР. Силите на ОН се распоредени во таа земја во 2013 година.