Екипата на Манчестер сити е прва во историјата на фудбалската игра што вреди над една милијарда евра. Ова го покажа истражувањето на Меѓународниот центар за спортски истражувања (ЦИЕС) со седиште во Нојшател, Швајцарија. Неговите стручњаци дојдоа до пресметка дека менаџерот Пеп Гвардиола потрошил 1,14 милијарди евра за „граѓаните“.
Најблиску до границата од милијарда евра е ПСЖ чиј тим „тежи“ 913 милиони евра или 11 милиони евра повеќе од Реал Мадрид. Во топ 10 се и Манчестер јунајтед со 751 милион евра, Јувентус со 719 милиони евра, Барселона со 697 милиони евра, Ливерпул со 639 милиони евра, Челзи со 561 милиони евра, Атлетико Мадрид со 550 милиони евра и Арсенал со 498 милиони евра.
Истражувањето на ЦИЕС укажува и за јазот на вредноста меѓу клубови во петте најсилни европски национални првенства. Најголема е разликата во шпанска Примера во која Реал Мадрид има 148 пати поскап тим од финансиски најслабата Мајорка за која игра Александар Трајковски. Во француската Лига 1, ПСЖ има 114 пати повреден состав од Олимпик Ним на Влатко Стојановски додека ростерот на Баерн Минхен во Бундеслигата е за 85 пати помоќен од Падерборн. Јувентус е 63 пати поскап од Лече во италијанската Серија А, а најмала е разликата во англиската Премиерлига во која Норич е за 32 пати поефтин од Манчестер сити.