Италијанскиот претседател Серџо Матарела му додели мандат на поранешниот директор во ММФ, Карло Котарели, за формирање преодна влада, а наскоро се можни и нови избори.
Техничката влада би ја предводела земјата до нови избори. Ако добие доверба од Парламентот, ќе предложи буџет и на почетокот на 2019 година може да се одржат нови парламентарни избори.
Доколку не добие парламентарна доверба, тој ќе инсистира на итни нови избори, а тие би можеле да се организираат уште во август, изјави Котарели.
Ваквиот развој на настаните следи, откако претходно пропадна обидот за формирање нова влада од страна на еврокритичката алијанса составена од движењето Пет ѕвезди и деснопопулистичката партија Лега.
Претседателот Матарела одби да го назначи критичарот на еврото и на Германија, Паоло Савона за министер за економија.
Движењето Пет ѕвезди и Лега најавија спротиставување на изборот на техничка влада. Шефот на Лега, Матео Салвини, се изјасни против покренување импичмент за Матарела, а двете партии размислуваат околу заеднички настап на евентуалните нови избори.
Котарели од 2008. до 2013. година беше директор во ММФ, а во владата на премиерот Енрико Лета извршуваше задача „комесар за штедење“.