Изборите не донесоа промена на критиките на Европската унија кон Македонија и нејзината власт.
Европскиот парлемент (ЕП) се подготвува повторно да бара од нашите политичари и да му дадат поддршка на СЈО, да го применат Пржинскиот договор кој ќе го олесни решавањето на спорот со името, да престанат да ги напаѓаат невладините организации, да го ослободат судството од политички притисок, да им овозможат на медиумите слободно да работат.
Словенечкиот пратеник Иво Вајгл, известувач за нашата земја во Европскиот парламент (ЕП) ја скицираше својата Резолуција која треба да биде усвоена во март или април.
Нацрт Резолуцијата ќе биде дебатирана идниот понеделник во Брисел на сесија на Комисијата за надворешни работи на ЕП.
Што содржи нацрт Резолуцијата?
Вајгл го поздравува “почитувањето на фундаменталните слободи” за време на изборите и бара од партиите да ги прифатат резултатите поради стабилноста на државата и излез од кризата. Текстот бара брзо формирање влада. Но додава дека е неопходна соработка помеѓу сите партии за да се решат домашните проблеми и предизвици.
Витално е за демократскиот процес да му се овозможи на СЈО да ја врши својата работа со целосна автономија.
Резолуцијата вели дека изборниот процес се подобрил но изразува надеж дека ќе се поправат сите изборни нерегуларности како “заплашување на гласачите, купување гласови, злоупотреба на јавните ресурси” и дека изборната администрација ќе се деполитизира воочи локалните избори во мај.
Преговорите со ЕУ можат да придонесат за толку неопходните реформи кои позитивно ќе влијаат на решавањето на спорот со името.
ЕП ќе бара од новата влада, во соработка со сите партии, да влезе во реформите кои се значајни за европска интеграција.
“Ја повторуваме поддршката за отворање преговори за членство, условени со напредок во примената на Пржинскиот договор и Итните реформи (зн. “Прибе реформи”) и остануваме уверени дека преговорите можат да придонесат за толку неопходните реформи кои позитивно ќе влијаат на решавањето на билатералните спорови”, вели нацртот на Резолуцијата.
Сето ова треба да го провери Европската комисија во текот на 2017 година, бара Резолуцијата.
Резолуцијата бара да се прави токму спротивното од она што се случува на нашата политичка сцена а тоа е политичка волја за надминување на политиката на поделби во која значајна улога има Собранието.
Понатаму, Резолуцијата бара да се прави токму спротивното од она што се случува на нашата политичка сцена а тоа е политичка волја за надминување на политиката на поделби во која значајна улога има Собранието.
И токму Собранието треба да продолжи со работа во собраниските комисии како онаа за прислушувањето и службите за разузнавање за кои е потребен пристап до сите податоци. А Собранието треба да воспостави кредибилна контрола врз овие служби.
Потоа следува барање на реформа на политизираната јавна администрација и притисоците врз вработените, за реформа на судството кое е постојано цел на политичко мешање вклучително и именувањето и унапредувањето на судиите и обвинителите и барање за професионализација на Судскиот совет.
Нападите и опструкциите врз работата на СЈО го загрижуваат Вајгл кој ова им го пренесува на своите колеги од ЕП: “витално е за демократскиот процес да му се овозможи на СЈО да ја врши својата работа со целосна автономија”.
Вајгл бара од своите колеги европски пратеници да го поддржат во повикот да се престане со “радикални и неосновани напади” врз невладиниот сектор, странски претставници и медиумите.
“Загрижени сме поради ограничената определба и недоволна соработка со граѓанските организации на сите нивоа и бараме од компетентните власти да ги вклучат невладините организации во креирањето на политиката”.
Загриженост за слободата на медиумите и говорот на омраза.
Нацртот изразува загриженост и за чувствителната меѓуетничка ситуација и бара од сите партии да промовираат толерантно мултиетничко општество и ги потсетува лидерите дека се обврзале на целосна примена на Охридскиот договор (ОД) и негов преглед. Ова е и барање на лидерите на ЕУ од 2015 година (кое можете да го најдете тука на страна 14 на документот) но тоа досега не е направено.
Нацрт Резолуцијата изразува загриженост за слободата на медиумите и говорот на омраза, политичките притисоци и мешање и бара од власта ги истражи сите жалби за заплашување и насилство врз новинарите и одговорните да ги изведе пред правдата.
Да се престане со “радикални и неосновани напади” врз невладиниот сектор, странски претставници и медиумите.
Сето ова не е воопшто добро за економијата а сивата економија се зголемува и се пречка за бизнис заедницата. Во земјата постои макро економска стабилност но невработеноста е премногу висока особено помеѓу младите и жените. Накусо, властите треба конечно да ги решат структурните проблеми на повеќе децениската македонска невработеност.
Европскиот одговор на сите овие проблеми што доаѓаат од начинот на кој власта ја раководи Македонија е уште едно намалување на ЕУ ИПА фондовите за 27 милиони евра, вели нацртот.
Резолуцијата не е законски текст, но по усвојувањето станува документ по кој ќе се раководат европските пратеници во наредните 12 месеци. Европските пратеници треба да поднесат амандмани во текот на февруари.