Хрватска ги регистрира првите случаи на Омикрон, новата варијанта на коронавирус, во земјата.

Имаме два случаи во кои е потврден омикрон, рече првиот човек на Хрватскиот институт за јавно здравје, Крунослав Чапак на вонредна прес-конференција во Загреб

„За едниот имаме сигурни резултати дека е омикрон, а во другиот случај господинот бил вакциниран, бил позитивен, но количината на вирусот била премала за да се потврди. Секвенционирањето, сепак, покажа дека е истата мутација што е забележана во Боцвана“, рече микробиологот, Љиљана Жмак.

Епидемиологот Бернард Каиќ изјави дека биле интервјуирани двајца пациенти со цел да се откријат изворите на инфекцијата и да се идентификуваат нивните контакти.

Не можеме со сигурност да го утврдиме изворот, бидејќи тие не патувале надвор од Хрватска, но сигурно е дека се заразиле на еден деловен состанок каде биле заедно. Значи, учесниците на тој собир се истовремено и контакти и мора да бидат ставени во карантин, а постои можност некои од нив да биле изворот. Меѓу нив има и странци и за тоа ги информиравме нивните земји. Мислам дека е неизбежно да има и други случаи. Беше прашање на време кога ќе дојде во Хрватска и сигурно ќе има нови случаи, рече Каиќ, додавајќи дека 13 лица од деловниот собир се веќе тестирани.

Тој рече дека „болеста е слична на грип“ и се манифестира со треска и чувство како човек да е „згазен од воз или автобус и трае неколку дена“.