Пјонгчанг во наредните 16 дена ќе биде центар на светскиот спорт. Јужна Кореја по вторпат во историјата ќе биде домаќин на Олимпијада, за првпат на зимска по летната што ја организира во Сеул во 1988 година, што по многу нешта се разликува од претходните. Ќе биде најмасовна досега со 2,952 олимпијци од 92 земји кои ќе учествуваат во 102 натпреварувања во седум спорта, односно, 15 дисциплини. Меѓу нив и тројца спортисти од Македонија – Антониот Ристевски (алпско скијање – слалом и велеслалом), Ставре Јада (крос кантри – спринт на 1,6 километри и трка на 15 километри) и Викторија Тодоровска (крос кантри – трка на 10 километри).
Свеченото отворање е во 20 часот по локално време, т.е. 12 часот по македонско со пренос на МРТ 1. На церемонијата заеднички ќе продефилираат спортистите од Јужна и од Северна Кореја кои ќе имаат и заедничка репрезентација на женскиот турнир во хокеј на мраз. Она што 23. ЗОИ ги прави поинакви од другите е суспензијата на Русија од Интернационалниот олимписки комитет која, сепак, ќе има 169 свои претставници како „независни спортисти“. Судбината на олимпискиот стадион во Пјонгчанг, град што се наоѓа на само 80 километри од најблиндираната граница на планетата, пак, ги прави Игрите единствени досега.
За подигнување на објектот беа потрошени 109 милиони долари (вкупните трошоци на Јужна Кореја за организација се проценуваат на 13 милијарди долари). Но, стадионот, како што е најавено, ќе биде урнат по само четири настани – отворање и затворање на Олимписките и на Параолимписките игри. Како причина за тоа се наведуваат екстремно ниските температури во областа во овој период од годината што зданието го прават нефункционално со оглед дека нема кровна конструкција.
Игрите во Пјонгчанг за првпат ќе опфатат неколку нови дисциплини како „биг ер“ во сноуборд, масовен старт во брзо лизгање, мешани парови во карлинг и екипен натпревар во алпско скијање.
Јужна Кореја стационира 600.000 војници во градот со околу 44.000 жители чија цел ќе биде безбедност на Игрите.