Рафаел Надал го детронизира Александар Зверев на Мастерсот во Рим. Шпанскиот тенисер во финалето го совлада Германецот со 6:1, 1:6, 6:3 за осма титула во италијанскиот главен град, но и за враќање на лидерската позиција на АТП листата.
Двајцата тенисери имаа по свои периоди во финалето пред прекинот поради дожд. Надал доминира во воведниот сет што го запиша со 6:1, Зверев возврати на идентичен начин во вториот сет. Решавачкиот почна со брејк на обете страни по што настапи 50 минутна пауза во момент кога Зверев водеше со 3:2 и изгледаше како да е поблиску до конечен триумф.
Меѓутоа разведрувањето над Рим како да донесе разведрување и на Надал кој по враќање на терен наметна ритам што противникот не можеше да го следи, па кратко потоа беше принуден да го предаде тронот.
За Надал ова е 32. Мастерс титула во кариерата. Турнирот во Рим се играше за награден фонд од 4,8 милиони евра и беше последен од Серијата 1.000 пред вториот гренслем во сезоната, Ролан Гарос што почнува утре во Париз.
АТП Мастерс во Рим / награден фонд 4,8 милиони евра
Финале: Надал (1., Шпанија) – А. Зверев (2., Германија) 6:1, 1:6, 6:3