Првиот меч во Германија е минато, предноста од еден гол (29:28) во „Шпаркасе арена“ се става настрана, а во реваншот се влегува како да е 0:0. Ракометарите на Вардар попладнево од 17 часот во СЦ „Јане Сандански“ ја бијат решавачката битка за ново учество на Фајналфор турнирите во Лигата на шампиони што носи и нов предизвик. Ако мисијата лани беше освојување на престижниот трофеј, оваа година се однесува на негова одбрана. На пат до Келн стои Кил кој никако не смее да се потцени и покрај негативата со која допатува во Скопје. За тоа се свесни до последен во ростерот на Раул Гонзалез, знаат дека ќе настапат за последен пат на домашен терен како целина, најавуваат натпревар полн со емоции и очекуваат дека нема да паднат под притисокот што е присутен како последица на сплет на околности.

„Ќе играме за последен пат како домаќини во Лигата на шампиони во оваа сезона. Имаме залиха од еден гол и тоа е добро, но не смееме да се опуштиме. Кил поседува квалитет, располага со поединци кои ќе знаат да се снајдат во Скопје. Во првиот меч се соочивме со доста проблеми со нивната дефанзивна формација 3-2-1 за што овојпат сме подготвени. Сите сметаат дека ќе немаме проблем во нашата сала, сите очекуваат триумф од нас, но ќе играме под притисок, ќе биде тешко. Наспроти нас е одличен ривал“, нагласува Раул Гонзалез, тренерот на вардарци, кој од наредната натпреварувачка сезона го презема кормилото на ПСЖ.

Она што е сигурно е дека европскиот првак го очекува френетична поддршка од трибините што, пак, ќе претставува пекол за германскиот претставник. Капацитетот на салата беше распродаден по само неколку часа од пуштање во продажба на влезниците. Очекувањата на гледачите се единствени. Посакуваат нова голема игра од нивните миленици и причина за уште една заедничка прослава на пласман на спектаклот во Келн.

„Имаме гол повеќе од Кил, но тој меч го заборавиме и во реваншот ќе влеземе како да е 0:0. Да не заборавиме дека Кил е еден од најдобрите клубови во ракометната историја. Го респектираме противникот, но фокусирани сме на нас, нашата игра и желбата за повторен настап на Фајналфорот што е единствена опција“, порачува кружниот напаѓач, Стојанче Стоилов, стрелец на пет погодоци во „Шпаркасе арена“.

Прв учесник на завршниот турнир е тимот на ПСЖ кој и во реваншот славеше на Кјелце со 35:32. Покрај дуелот во Скопје меѓу Вардар и Кил, попладнево и преостанатите две реванш четвртфинални пресметки во кои Скјерн е домаќин на Нант на Кире Лазаров од 16.50 часот, а Монпелје на Фленсбург од 19 часот.

Лига на шампиони

Четвртфинални мечеви, реванши

Вардар – Кил (29:28)

Скјерн – Нант (27:33)

Монпелје – Фленсбург (28:28)

ПСЖ – Кјелце 35:32

Во заграда се резултати од првите средби.