Кинеските клубови се доведени до ѕид и, се чини, во безизлезна позиција. За добар дел од нив е дојден моментот за соочување со суровата реалност по договорите со вртоглаво понудени суми за трансфери, плати, рати и бонуси за привлекување на фудбалски ѕвезди од европскиот континент.
Повеќе од половината екипи во кинеското елитно друштво не вршат редовна исплата на своите играчи, стои во извештајот што Суперлигата на Кина го испрати до Азиската фудбалска конфедерација (АФЦ), па, за ублажување на непријатната ситуација се активирани ултиматуми.
Клубовите добија рок до 15 август да „измислат“ пари за подмирување на обврските или во спротивно ќе бидат ифрлени од највисокиот кинески фудбалски ранг за наредната сезона. Од нив, покрај тоа, се бараат и гаранции за избегнати на исти или слични ситуации во иднина. Од АФЦ, пак, веќе најавија изрекување на можна забрана за учество во континенталните натпреварувања ако проблемот не биде решен.
Како најпроблематични се водат Хебеи Чајна Форчјун (менаџер Мануел Пелегрини), Шангај СИПГ (менаџер Андре Вилјаш Боаш) и Шангај Шенхуа (менаџер Гус Поје) во чии дресови играат и некои од најголемите фудбалски ѕвезди во Кина како Карлос Тевез, Оскар, Грацијано Пеле, Хулк, Обафеми Мартинс, Фреди Гварин, Жервињо, Езекил Лавеци, Стефан Мбиа, Рикардо Карвалјо, итн.
На тапет се и Пекинг Гоуан, Чангчунг Јатаи, Чонгкинг Дандаи, Гвангжу Евергранде, Гвангжу Р&Ф, Џиангсу Сунинг, Лиоанинг, Шандонг Луненг, Тианџин Куајџан и Тианџин ТЕДА, екипа за која во сезоната 2012/13 настапуваше и Величе Шумуликоски.