Притисоците од страна на раководните лица во институциите врз вработените и денес не запираат, преку соопштение информираат од кабинетот на дополнителниот заменик министер за администрација Александар Кирацовски.
„Раководните лица вршат притисок врз вработените за присуство на протест пред Државната Изборна Комисија, со цел да протестираат и да извршат притисок врз работата и носењето на одлуки на истата. Правото на протест е загарантирано со Устав, меѓутоа уште еднаш потсетуваме дека извршување на партиски и изборни активности во текот на работното време во јавниот сектор е спротивно на Законот за вработени во јавниот сектор, а вршењето на закана, оневозможување и спречување на утврдување или објавување на резултатите од гласањето е казниво согласно член 158 од Кривичниот законик“, пишува во соопштението на Кирацовски.
Од неговиот кабинет додаваат дека поради притисоците кои им се вршат на вработените, тие поднеле иницијатива до Државниот инспекторат за труд, Државниот управен инспекторат и Министерството за внатрешни работи за вонреден надзор на работата на „Општина Карпош“, ООУ ,,Невена Георгиева – Дуња” – Скопје; „ЈСП Скопје“, ЈП ,,Македонски шуми” – Скопје, ЈП ,,Стрежево” – Битола; „ФОД Битола“, Ученички дом ,,Мирка Гинева” – Битола, ЈЗУ Општа болница ,,Борка Талески” – Прилеп.
„Сите што правеле злоупотреби и притисоци, ќе одговараат“, порачуваат од кабинетот на Кирацовски.