Нема дополнителни рестриктивни мерки за празниците, а дел од ковид центрите се затвораат и целата интерна клиника се враќа во нормала, истакна вчера министерот за здравство Венко Филипче.
Според него, сегашните рестриктивни мерки во пресрет на новогодишните празници се доволни со оглед на тоа што, како што рече, собири на јавни места има насекаде и пред Нова година. Практично, вели тој, кулминација ќе се достигне за време на новогодишните празници и по сето тоа ќе спласне.
Филипче истакна дека не може да се предвиди дали некоја варијанта на вирусот ќе придонесе за влошување на епидемиолошката ситуација, но додаде дека затоа акцент е ставен на вакцинацијата, оти, според податоци од студии, третата доза ја зголемува ефикасноста против најновиот сој омикрон.
Во однос на вакцинираните, министерот смета дека процентот е висок, но и дека интересот е спласнат.
Сметам дека опфатот, којшто според новиот попис е помеѓу 50, па дури и 55 проценти, ако се исклучат децата, сепак е висок, прилично висок процент. Жал ми е што спласна интересот и нема да достигнеме за кратко време 70 или 80 проценти опфат, изјави Филипче.
Министерот нагласи дека со овој опфат на вакцинација, ние во континуитет сме во подолг временски период на намалување на бројот на случаите.
Во претходното деноноќие беа регистрирани нови 320 случаи на ковид-19 од направени 3.366 тестирања или 9,5 отсто, што е во рамки на просечниот процент на позитивност од претходната недела.
Досега во земјата се направени вкупно 1.558.639 милиони тестирања на ковид-19. Вкупната бројка на ковид-дијагностицирани лица во нашата земја од почетокот на епидемијата изнесува 222.064, бројот на оздравени пациенти е 208.938, на починати е 7.853, а бројот на активни случаи изнесува 5.273.