#НикогашПовеќеВМРО pic.twitter.com/5LE3U42aRT
— EmptyPersona (@darkhour_seeker) April 28, 2017
Министерот за внатрешни работи, Агим Нухиу, денеска обелодени дека директорот на Бирото за јавна безбедност, Митко Чавков, синоќа постапувал по партиски директиви и одбил да соработува со неговиот надреден. Министерот го посочи Чавков како најдиректно одговорен за вчерашните крвави немири во Парламентот. Митко Чавков раководел со Оперативниот штаб во МВР, но два часа не издал никаква наредба за полициско засилување и дозволил насилниците да дивеат и тепаат во Собранието.
„Оперативниот штаб имаше подготвено планови за три претпоставени ситуации: кога ќе бидат протестите мирни, кога ќе се избира претседател на Собранието и кога ќе се избира Влада. За раководител на Оперативниот штаб беше избран директорот на Бирото за јавна безбедност Митко Чавков. Вчера од моментот на ескалација на ситуацијата се до 20 часот раководителот на Штабот Митко Чавков не беше достапен за мене иако го барав и телефонски и лично во Оперативниот штаб“, рече министерот Нухиу.
На фотографиите и видеата кои синоќа ги направија медиумите може да се видат лица во фантомки и маски и опремени со бубици и микрофони, на кои постојано комуницираат со некој. Тие влегоа многу лесно во Собранието, а полицијата не се обиде да ги спречи.
Полициски извори за НОВА ТВ велат дека акцијата е координирана од некаде затоа што симптоматично е како насилниците точно знаеле каде е прес центарот каде што во моментот се наоѓале пратениците од парламентарното мнозинство и лидерот на СДСМ имаше прес конференција.
Самиот Заев изјави дека вчера во Собранието имало обид за убиство со план и умисла.
„Ова вчера беше обид за убиство по план и добра умисла. Можете да го анализирате од влезот на луѓето, посочувањето, однесување, координирањето со полицијата, директно доаѓање до таму каде што се поединците каде се фокусирани“, рече Заев.
Министерот Нухиу рече дека веќе има докази дека дел од полициските сили биле координирани од партиски, наместо од Оперативниот штаб на МВР.
„Дел од вработените во МВР наместо да ги почитуваат законите и да ги извршуваат своите работни обврски, постапуваат по наредби на политички центри, нешто што е за најсилна осуда и мора да биде санкционирано. Внатрешната контрола при МВР е вклучена и ќе бараме одговорност од сите што не постапија согласно законските овластувања, вклучувајќи ги и членовите и раководството на Оперативниот штаб. МВР е институција која мора да го гарантира јавниот ред и мир, а не да биде институција под влијание на политички субјекти кои сакаат да ја злоупотребат за свои цели“, нагласи Нухиу.
Дел од тепачите се идентификувани и според нашите извори станува збор за лица со дебели криминални досиеја во полиција и блиски со ВМРО-ДПМНЕ.
Некои од нивните идентитети се откриени и на социјалните мрежи. Дел од нив себе си се нарекуваат тврдокорни, Ќосиња, следбеници на Тодор Александров, атентатори.