По трите неуспешни обиди, ракометарките на ЖРК Вардар, конечно, стигнаа до финале во Лигата на шампиони. И тоа не преку кого било туку преку, сé уште, актуелниот првак. „Црвено-црните“ го полуфиналето го детронизираа ЧСМ Букурешт по убедливиот триумф во „Ласло Пап“ арена во Будимпешта со 38:33 (полувреме: 21:13) како одмазда за ланскиот пораз во истата фаза. Финалето е утре од 17.45 ч. во кое вардарки ќе играат со Ѓер за континенталниот трофеј во обид да го повторат успехот на Кометал Ѓорче Петров од пред деценија ипол.
Вардарки завршија работа уште во воведните 30 минути. На одмор заминаа со огромни осум гола предност што беа доволни за продолжението и реализација на првичната мисија – пласман во финале, а потоа и генералната за што се работеше цела сезона – освојување на титулата. Тоа е, секако, можно ако ЖРК Вардар и против домаќинот на турнирот функционира како швајцарски часовник што беше случај против ЧСМ Букурешт.
Пенезиќ и Радичевиќ постигнаа по седум погодоци, Лекиќ реализира шест, Французинката Ниомбла со осум беше лидер на романскиот претставник.
Во меч за бронзениот медал утре (15.15 ч.) ќе разигруваат Будуќност и ЧСМ Букурешт.
ЧСМ Букурешт – ЖРК Вардар 33:38 (13:21)
Арена „Ласло Пап“ во Будимпешта. Гледачи: 12.000. Судии: Викторија Алпаидзе и Татјана Берескина (двете од Русија). Ц. картон: Хмирова (ЖРК Вардар).
ЧСМ Букурешт: Јордаче, Унгуреану, Грубишиќ, Гулден 4, Куреа 2, Даче, Агло 1, Базалиу 1, Брадеану 1, Торстенсен 5, Мартин Беренгвер 4, Манеа 2, Ниомбла 8, Лобач 3, Мехмедовиќ 2, Беме. Тренер: Пер Јохансон.
Седмерци: 5/8. Исклучувања: 2 минути. Технички грешки: 1
ЖРК Вардар: Лејно, Суслина, Пешоа, Радичевиќ 7, Кликовац, Херем 4, Мавсар, Дамњановиќ 2, Лазович 2, Алтхаус 1, Пенезиќ 7, Човиќ 3, Лакрабер 5, Хмирова 1, Лекиќ 6, Ристовска. Тренер: Ирина Дибирова.
Седмерци: 0/2. Исклучувања: 12 минути. Технички грешки: 3
Лига на шампиони – Фајналфор (Будимпешта)
Полуфинале
ЧСМ Букурешт – ЖРК Вардар 33:38 (13:21)
Будуќност – Ѓер 20:26 (9:12)
За трето место: Будуќност – ЧСМ Букурешт (недела, 15.15 ч.)
Финале: Ѓер – ЖРК Вардар (недела, 17.45 ч.)