Балканската класика на Европското ракометно првенство ѝ припадна на домашната селекција. Хрватска ја порази Србија со 32:22 во „Спаладиум арена“ во Сплит за заокружување на првото коло во групата А, откако претходно Исланд ја совлада Шведска со 26:24.
Лука Степанчиќ и Мануел Штрлек беа први стрелци со составот на Лино Червар со шест погодоци колку што постигна и Петар Ненадиќ за поразената репрезентација. Во тимот на Јовица Цветковиќ, кој се загуби во второто полувреме, се истакна уште Немања Зеленовиќ со пет гола.
Франција, пак, во дербито на групата Б во Пореч ја победи Норвешка со 32:31. Најзабележителен на средбата беше Кентин Мае со осум гола, Михал Гогу додаде пет за „триколорите“, а Никола Карабатиќ четири. Реализаторски најрасположени на спротивната страна беа Кент Робин Тонесен со седум гола, Кристијан Бјорнсен со шест и Бјарте Мирол со пет.
Македонија својот премиерен настап на ЕП 2018 ќе го има утре од 19,30 часот во „Загрепска арена“ против селекцијата на Словенија. Германија, претходно (17.15 ч.) во истата конкуренција, ќе игра против Црна Гора, а групата Д, во Вараждин, ги носи натпреварите меѓу Шпанија – Чешка (18,15 ч.) и Данска – Унгарија (20,30 ч.).
ЕП во ракомет
Група А (Сплит), 1 коло
Хрватска – Србија 32:22
Шведска – Исланд 24:26
Група Б (Пореч), 1 коло
Франција – Норвешка 32:31
Белорусија – Австрија 27:26
Утре на ЕП
Група Ц (Загреб), 1 коло
Германија – Црна Гора (17.15 ч.)
Македонија – Словенија (19,30 ч.)
Група Д (Вараждин), 1 коло
Шпанија – Чешка (18,15 ч.)
Данска – Унгарија (20,30 ч.)