Во интервју за „360 степени“ премиерот Димитар Ковачевски на прашањето дали е против коалиција на СДСМ и ВМРО-ДПМНЕ одговори дека таа коалиција би била нефункционална, непрактична и непринципиелна. Зборувајќи за состојбите во партијата и пишувањата за евентуални несогласувања со неговиот претходник, Ковачевски одговори:
-Секогаш тие такви натписи се интересни за јавноста, тоа е природно, секогаш биле, се и ќе бидат. Најдобриот демант дојде од самиот поранешен претседател на СДСМ, г- динот Зоран Заев кој што сите тие натписи ги демантираше. СДСМ е политичка партија која што брои 84 илјади членови. Во СДСМ се одвива демократска дискусија на различни нивоа, меѓутоа одлуките се носат низ дискусија и низ гласање на телата на партијата, а тоа се раководството на партијата, Извршниот одбор и Централниот одбор, што се однесува до генералните политики и сите одлуки кои што се до сега носени се донесени од телата и се донесени едногласно без ниту еден глас против, истакна Ковачевски.
Тој ја коментираше и тезата за некаква можна коалиција помеѓу СДСМ и ВМРО – ДПМНЕ.
-Јас лично сметам дека тоа е непрактично, нефункционално и непринципиелна идеја од повеќе причини. Прво, ако ги погледнете програмите и ако ги погледнете ставовите за генералните прашања помеѓу СДСМ и ВМРО – ДПМНЕ тогаш тоа се дијаметрално спротивни ставови. СДСМ и ДУИ и други политички партии, коалициони партнери на Владата ги донесоа најтешките и најдобрите одлуки за државата, членство во НАТО и отпочнувањето на преговори со ЕУ. ВМРО – ДПМНЕ е против. Второ, доколку ги погледнете ставовите на ВМРО – ДПМНЕ и на нивниот претседател во однос на престојните уставни измени со кои што ние го продолжуваме патот во ЕУ тогаш има неконзистентност од изјава во изјава. Прво се сеќавме сите тој на разговор снимен со бившиот премиер на Бугарија и кажа дека го прифаќа договорот за добрососедство со Бугарија. Потоа кажа дека не го прифаќа. Потоа кажа пред бугарскиот премер Петков дека е за уставни измени, за да потоа каже дека е против уставни измени. Па да бара нотарски заверки од пратениците дека нема да гласаат. За да потоа каже дека е за уставни измени, ако некој во ЕУ даде некакви гаранции, за да потоа каже дека не е. Со таков неконзистентен став, прво станаа заложници на Левица, второ станаа одлична подлога за провокатори кои што сакаат да ги нарушат односите на С. Македонија регионално. Со тоа да со спречат европскиот пат и европската интеграција на државата, нагласи премиерот.
Тој исто така кажа дека има контакти со сите бивши претседатели на СДСМ на принципиелна основа.