Бројот на активни случаи на ковид-19 во државава изнесува 7.275 од кои најголем број 3.508 се регистрирани во Скопје. Во Куманово има 424 активни случаи, во Битола 358, во Прилеп 336, во Велес 335, во Кавадарци 281, во Штип 236, во Кочани 198, во Охрид 191, во Тетово 170, итн.
Министерството за здравство (МЗ) вчера соопшти дека од 1.323 основци и средношколци кои досега се опфатени со скринингот за откривање на ковид-19 во училиштата, вирусот бил потврден кај шест ученици. Тестирани се 725 основци од прво до деветто одделение и 598 средношколци од подрачјето на Кочани, Штип, Велес, Скопје, Куманово, Прилеп, Битола, Струмица, Тетово и Охрид.
Од МЗ информира дека во моментот се активни 885 деца на возраст од 0 до 17 години. На Институтот за белодробни заболувања Козле хоспитализирани се 19 деца на возраст од 9 до 16 години. Еден пациент е на кислородна поддршка, а сите останати имаат лесна клиничка слика. Ниту едно од хоспитализираните деца не е вакцинирано.
Досега во земјава, според податоци од националниот систем „Мој термин“, 5.800 деца на возраст од 12,13,14,15,16 и 17 години примиле една доза на анти-ковид вакцина, а ревакцинирани се 4.860 малолетници.
Во текот на завчерашниот ден беа аплицирани вкупно 3.838 дози на вакцини, од кои 758 како прва доза, 787 како ревакцини, а 2.293 граѓани примиле трета доза. Заклучно со 3 ноември, вкупно се вакцинирани 807.528 граѓани, ревакцинирани се 778.482, а трета доза примиле 38.719 граѓани. Повеќе од пола или 54 отсто од граѓаните над 40-годишна возраст се ревакцинирани, а 33 отсто од популацијата од 18 до 39 години примиле барем една доза вакцина.
Опфатот со вакцинација со една доза вакцина на полнолетната популација е 57 проценти, а со две дози опфатени се 46 проценти од граѓаните над 18 години. Според бројот на аплицирани вакцини, 39 отсто од целата популација во нашата земја е вакцинирана, а 37 проценти од популацијата во државата примила две дози вакцина, наведуваат од МЗ.
Вкупниот број ковид-дијагностицирани лица во земјава од почетокот на епидемијата изнесува 204.416, бројот на оздравени пациенти е 189.947, а на починати е 7.194.
Од вчера преку страницата vakcinacija.mk почна и пријавувањето за вакцинација од сезонски грип. Од МЗ соопштија дека и годинава се набавени 40.000 бесплатни дози на четиритипни вакцини против сезонски грип за ризичните групи. Овие вакцини, како што посочуваат, ќе можат да ги добијат стари лица над 65 години, лица со хронични заболувања, здравствени работници, бремени жени и децата на возраст од шест месеци до пет години.