За да се постигне колективен имунитет на населението, треба да се вакцинираат над 80 отсто од граѓаните, вели министерот за здравство Венко Филипче и во тој контекст ги нагласи постојаните апели и кампањи во насока на кревање на свеста на населението за потребата од имунизација.

– Треба да се постигне колективен имунитет од 80 отсто, а ние сме далеку од тоа и затоа се нашите апели и кампањи, и преку Министерството, Владата, Канцеларијата на ЕУ, преку УНИЦЕФ со цел граѓаните да се вакцинираат. Достапна е вакцината во сите пунктови, никој од граѓаните кој ќе се пријави за вакцинација нема да биде вратен со цел да имаме нормален живот, изјави вчера Филипче.

Министерството за здравство соопшти дека на територијата на цела држава една доза вакцина досега примиле 27,5 отсто од граѓаните. Последните анализи покажуваат дека најголем процент на вакцинирани граѓани има во Кавадарци – 43,5 отсто, потоа следи Охрид со 42,9 отсто и Гевгелија со 41 отсто. Најмал процент вакцинирани граѓани има во Дебар 17,3 отсто, во Тетово 17,1 отсто, а во Кичево 15,8 отсто.

Филипче порача дека вакцините се ефикасни и безбедни и оти единствениот начин да не бидеме затворени и да се вратиме на старите навики е што поголем број на вакцинирани граѓани и само така може да се придонесе до создавање на колективен имунитет и совладување на пандемијата. Министерот информира дека се следат трендовите насекаде во регионот и додаде дека нема некоја голема разлика во опфатот со вакцинација.

– И тука се сите земји. Кај нас близу 450.000 граѓани веќе се вакцинирани, од нив 270.000 се ревакцинирни, рече Филипче.

Министерот најави дека ќе продолжат да го одржуваат системот со вакцинација како што е сега: сите пунктови за вакцинација да се отворени, граѓаните се пријавуваат без термин, никој да не се врати и нагласи дека вакцини има сосема доволно. Тој соопшти дека теренската вакцинација ќе оди по систем на ротација. Тоа значи ако некое место е поминато, кога ќе се поминат сите други места, околу тој здравствен дом ќе се повтори циклусот.

– Отворени се вакциналните пунктови за деца. Околу 1.800 деца се пријавени, а околу 500 веќе се вакцинирани. Меѓутоа сето тоа не е процент што може да нè заштити од нов бран. Граѓаните треба да се свесни дека ако не се вакцинираат има сериозно голема шанса да заболат од болест предизвикана од вирус кој многу веројатно ќе ги смести во болница и многу веројатно има голема шанса да имаат компликации. А го имаат овој механизам, инструмент да се вакцинираат и да се заштитат, нагласи Филипче.

Како што информира, од индискиот сој на вирусот во последната недела се детектирани уште пет случаи, а ги има и другите соеви.

– За сите соеви, за сите мутации на вирус, вакцината е единствен спас и мора граѓаните да се свесни дека тоа е начинот на кој ние можеме да ставиме крај, порача Филипче.