Во ковид-статистиката вчера, како и во деновите од викендот, беше забележан пад на бројот на заразени во однос на направени тестирања. Од 1.514 тестирања, беа регистрирани 135 нови случаи или околу девет проценти. Во работните денови, тој процент се движи од 10 до 16. Од друга страна, забележан е пораст на активните случаи во последните пет дена. На 20 октомври имало околу 5.700 активни случаи, а вчера беа регистрирани околу 6.200.

Вчера беа регистрирани и 11 починати лица, како и 330 оздравени пациенти.

Досега во земјата се направени вкупно 1.366.002 тестирања на ковид-19. Вкупниот број на лица со дијагностициран ковид во земјава од почетокот на епидемијата изнесува 199.901, бројот на оздравени пациенти е 186.652, на починати е 7.062, а на активни случаи изнесува 6.187.

Според епидемиолошки анализи во моментот, пола од активните случаи или 3.190 се регистрирани во Скопје. Следи Куманово со 446 активни случаи, Велес со 309, Прилеп со 245, Битола со 201, итн.

Државните здравствени институции продолжуваат со вакцинација на населението против ковид-19. Во  државата се вакцинирани над 800.000 граѓани. Воедно, над 5.000 лица примиле трета доза на анти-ковид вакцина.

Од популацијата над 40-годишна возраст ревакцинирани се 54 отсто, а 33 проценти од лицата од 18 до 39 години примиле најмалку една доза вакцина, велат од Министерството за здравство (МЗ). Опфатот со вакцинација со една доза на вакцина на полнолетната популација е 57 отсто, а со две дози опфатени се 46 проценти од граѓаните над 18 години.

Според бројот на аплицирани вакцини, 38 отсто од целата популација во земјава е вакцинирана, а 35 проценти од жителите примиле две дози на вакцина.