Кривичниот суд и ВМРО-ДПМНЕ денеска речиси со иста реакција реагираа на соопштението на СЈО од пред неколку дена, во кое СЈО се жали на соработката на судот со обвинителството.
Обвинителката на Специјалното јавно обвинителство, Лиле Стефанова на 20 јануари ги поднела барањата кај дежурниот судија на претходна постапка што спротивно на Деловникот за работа на судот, реагираат од Кривичниот суд на соопштението на СЈО, во кое ова обвинителство се жали на лошата соработка со судот.
„На 20.01.2017 година, јавениот обвинител Лиле Стефанова од СЈО додека се уште траело работното време во судот, пристигнала во судот и се упатила директно кај дежурниот судија на претходна постапка со 4 барања, што е констатирано и од самиот дежурен судија на барањата кој ги примил во 16:05 часот, без притоа обвинителот истите да ги поднесе преку приемното одделение кај овластениот службеник, а што е спротивно од Деловникот за работа на судот и укажувањето на претседател на судот, да се почитува Деловникот за работа при прием на писмена во судот, заведување и оформување предмет и внесување во АКМИС – електронскиот систем на судот“, пишува во реакцијата на судот.
Од таму додаваат дека предметите во Кривичните совети се доделуваат на ист начин како и во останатите оддели и дека се внимавало кој судија колку пати постапувал во советите, а со цел да се запази принципот на рамномерност односно еднаква распределба на предметите кај сите судии кои одлучуваат самостојно.
„Дополнително, зачудува заканувачкиот вокабулар во писмените дописи и јавни соопштенија на СЈО кон судот и судиите, а јавното повторување на имињата и презимињата на судии на претходна постапка и судии во Кривичните совети кои постапуваат по конкретни предмети не можат да влијаат врз судиите во овој суд и нивното непристрасно и законито одлучување. Особено ако се земе во предвид начинот на презентирање на соопштенијата каде за судските одлуки од кои СЈО не се задоволни ги објавуваат имиња и презимиња на судиите, додека за оние одлуки од кои се задоволни не ги објавуваат имињата и не се информира јавноста иако се работи за истите судии со што се прави обид за јавен линч на судиите“, реагираат од Кривичниот суд.