Еузебио ди Франческо е на излезна врата на „Олимпико“. Фиорентина ја понижи Рома со 7:1 во четврт-финалето во Купот на Италија, исход што многу веројатно ќе продуцира тренерска смена на клупата на „волчицата“.
„Виолетовите“ во целост ги надиграа нивните римски гости и заслужено се пласираа во полуфиналето. Хет-трик постигна Федерико Киеза во седмата минута, во 18. минута и во 74. минута, мрежата на Олсен ја „решетаа“ уште Муриел во 33. минута, Бенаси во 66. минута и на двапати Симеоне во 79. минута и во 89. минута. Почесниот погодок за Рома беше дело на Александар Коларов во 28. минута.
Рома за првпат прими шест или повеќе голови во италијанскиот куп по 1961 година. Она што е заедничко за двата меча е Фиорентина која и тогаш беше „џелат“ за римската волчица која со идентичен резултат беше надиграна и декласирана од Манчестер јунајтед и во Баерн Минхен во Лигата на шампиони.
Јувентус, пак, е запрен во походот за одбрана на Куп трофејот во Италија. Аталанта во Бергамо ја совлада „старата дама“ со убедливи 3:0. Двоен стрелец за домашните беше Колумбиецот Дуван Запата во 39. минута и во 86. минута, една реализација запиша и Белгиецот Тимоти Кастање во 37. минута.
Пласман во полуфинале обезбеди и Милан по тримфот над Наполи со 2:0 со двата гола на Криштоф Пјонтек, а последниот учесник во големата четворка ќе биде познат по дуелот Интер – Лацио (четврток, 21 ч.).
Куп на Италија – четврт-финале
Аталанта – Јувентус 3:0
Фиорентина – Рома 7:1
Милан – Наполи 2:0
Интер – Лацио (четврток, 21 ч.)