Доскорешниот канцелар и шеф на Народната партија (ОВП), Себастијан Курц денеска положи заклетва во австрискиот парламентот и на тој начин повторно стана пратеник. Тој во саботата поднесе „привремена“ оставка, откако Државното обвинителство за борба против корупцијата отвори истрага против него и врвот на ОВП за поткуп и корупција.

Наместо Курц, канцелар стана министерот за надворешни работи, Александар Шаленберг, а Курц за време на истрагата ќе биде пратеник и шеф на пратеничката група на ОВП во парламентот.

Утрово Курц положи заклетва со што и формално ја презеде новата функција. Патем, тој има намера да се врати на функцијата канцелар кога обвинувањата на обвинителството против него, како што рече, „ќе се покажат како неосновани“.

Поради враќањето на Курц во парламентот, пратеничката Ирена Нојман-Хартбергер, која доби мандат по изборите, мораше да се повлече од Собранието.

Австриски „Курир“ наведува дека Курц денеска нема да се обрати во Собранието. Тој само накратко изјави дека е благодарен на пратениците на ОВП што му веруваат и што му даваат 100 отсто поддршка, со тоа што гласаа за него за шеф на пратеничката група.

Фотографиите објавени на порталот покажуваат дека Курц влегол насмеан во парламентот во придружба на свои сопартијци. 

Јас не сум робот, грешам

Утрово Курц објави петминутно видео на Фејсбук во кое се обраќа до јавноста. Тој рече дека во оптек имало многу СМС пораки што тој не ги напишал, а го донеле во врска со аферата за која е обвинет. Кога станува збор за пораките што ги напиша, тој рече дека „не е робот, туку човек со грешки и емоции“ и дека денеска нема да напише некои формулации што тогаш ги компонирал.

Тој посочи дека се извинил за тие пораки и дека се кае за нив. Сепак, тој нагласува дека СМС-пораките не се и немаат никаква врска со какво било криминално дело, и намерно се објавени во јавноста за да му наштетат на ОВП и него лично.

Курц побара да се направи јасна разлика помеѓу текстуални пораки и обвиненија поврзани со злосторство. Кога станува збор за кривични дела, тој вели дека никогаш не направил ништо во целиот свој живот и вети дека како шеф на парламентарниот клуб, ОВП ќе го даде својот придонес и ќе ја поддржи владата.

Јас не сум канцелар во сенка, повтори Курц во пораката до граѓаните.

Тој посочи дека постои стабилна влада и дека граѓаните на Австрија го заслужуваат тоа. Курц повтори дека спречил коалиција од четири опозициски партии, ослободувајќи ја својата функција и овозможувајќи му на Александар Шаленберг да стане канцелар.