Шкендија загуби во Вилнус, но може да биде задоволна со конечниот исход со оглед на настаните на теренот во второто полувреме. Тракаи славеше со 2:1 во првиот меч од третото коло квалификации за Лига Европа што македонскиот вицепрвак го заврши со дури двајца играчи помалку.
Директен црвен картон во 57 минута доби Стенио Жуниор, стрелец на единствениот погодок за тетовци во Литванија, а пет минути подоцна по вторпат во бележникот на судијата од Северна Ирска влезе и Ардијан Цуцули. Двата гола за домашните беа дело на Максим Максимов во првата минута и во 52.
И покрај тоа, Шкендија успешно се носеше на теренот и одолеа на предизвикот да не прими и трет гол што ќе значеше и комплицирање на плеј-оф мисијата пред реваншот на „Младост“ во Струмица. Во контекст на таквата ориентација беа и замените на Ќатип Османи кој од игра ги повлече Бесарт Ибраими, Марјан Радески и Ферхан Хасани и на нивно место на тревникот, со дефанзивни задачи, ги испрати Бесмир Бојку, Мевљан Мурати и Олси Теќа.
Целта на крајот даде резултат. Минусот од еден гол од 52 минута остана и по 90., а тетовци притоа ја остварија една од желбите со кои отпатуваа во Литванија. Не победија, не ремизираа со голови меѓутоа постигнаа еден што го посакуваа кој може да биде и пресуден во двомечот и патникот во плеј-офот.
Реваншот меѓу Шкендија и Тракаи е наредниот четврток на стадионот „Младост“ во Струмица со почеток во 17 часот.
Тракаи – Шкендија 2:1 (1:1)
Стадион: „ЛФФ арена“ во Вилнус. Гледачи: 4.500. Гл. судија: Нил Дојл. Асистенти: Емет Динан и Дермот Броутон (сите тројца од Северна Ирска). Ж. картони: Климавичиус, Шишка (Тракаи); Цуцули, Хасани, Челиковиќ (Шкендија). Ц. картони: Жуниор 57′, Цуцули 62′ (Шкендија). Стрелци: Максимов 1′, 52′ за Тракаи; Жуниор 39′ за Шкендија.
Тракаи (формација: 4-3-3): Плукас – Вакили (Траоре 84′), Климавичиус, Јанушевскис, Боровскиј – Шиленас, Шишка (Јериоменко 80′), Воробјовас – Дорли, Бихенок, Максимов. Тренер: Олег Василенко.
Шкендија (формација: 4-2-3-1): Захов – Челиковиќ, Цуцули, Бејтулаи, Тодоровски – Алими, Тотре – Жуниор, Радески (Теќа 64′), Хасани (Мурати 90’+3′) – Б. Ибраими (Бојку 72′). Тренер: Ќатип Османи.