Работнички ќе мора да уфрли во поголема брзина и да биде на повисоко ниво во реваншот против белоруски Динамо за пласман во третото коло од квалификациите за УЕФА Европа лигата. Дебармаалци имаат 1:1 на домашен терен и потребни се гол(ови) за елиминација на тимот од Минск. Мечот на стадионот „Трактор“ е попладнево од 17 часот.

„Овојпат имаме јасна слика за противникот. Во дуелот во Скопје ги видовме и добрите и лоши страни на Динамо. На нас преостанува да одиграме на максимум од можностите и да се обидеме да извлечеме корист. Не очекува нималку лесна задача, но вербата и оптимизмот се присутни кај нас. Сигурен сум дека имаме сили за резултат што ќе значи пласман во наредното коло во Лига Европа“, порачува капитенот, Душко Трајчевски.

Екипата од Градски парк се избори за поповолен резултат пред реваншот со гол од пенал во самиот финиш на воведните 90 минути од двомечот. Имаше негатива во второто полувреме, имаше и исклучен играч меѓутоа остана истрајна во намерата да избегне пораз со ударот од белата точка на Бојан Најденов. Директен црвен картон претходно доби Емир Сахити.

„Динамо е во мала предност од аспект на физичката подготовка. Белоруското првенство е во тек и тимот од Минск зад себе има 15 настапи од натпреварувачки карактер што не е случај со нас. Ние во овој период влегуваме во ритам што верувам дека ќе го најдеме денеска за остварување на целта. За тоа ќе мора да одиграме подобро одошто беше случај во Скопје. Ако први постигнеме гол, мислам дека ќе бидеме многу блиску до третото коло“, додаде Трајчевски.

Исклучениот Сахити кај Работнички и Биков и Капленко кај Динамо нема да бидат во комбинација за денешниот натпревар за кој е делегирана судиска тројка од Франција на чело со Никола Раинвиј кому ќе асистираат Гилом Дебар и Филип Жан.

Подобриот од македонско-белоруската пресметка во третото коло ќе игра со победникот од дуелите меѓу АЕК Ларнака и Корк сити. Кипарскиот претставник, чиј дрес го носат Даниел Мојсов и Иван Тричковски, го дочекува ирскиот со 1:0 од првата средба.

Лига Европа/квалификации/2 коло/реванш мечеви

Денеска играат

Динамо Минск – Работнички (1:1)

Лингби – Слован Братислава (1:0)

Хелсинки – Шкендија (1:3)

Млада Болеслав – Шамрок Роверс (3:2)

Судува – Лиепаја (2:0)

Тракаи – Норчепинг (1:2)

ВПС – Брондби (0:2)

Динамо Брест – Алтах (1:1)

АЕК Ларнака – Корк сити (1:0)

АИК Стокхолм – Железничар (0:0)

Бран – Ружомберок (1:0)

Левски – Хајдук (0:1)

Митјиланд – Ференцварош (4:2)

Одд Гренланд – Вадуц (1:0)

Бнеи Јехуда – Тренчин (1:1)

Зарија Балти – Аполон (0:3)

Зира – Астра (1:3)

Ботев Пловдив – Беитар Ерусалим (1:1)

Фола Еш – Интер Баку (0:1)

Галатасарај – Естерсунд (0:2)

Утрехт – Валета (0:0)

Луцерн – Осиек (0:2)

АЕЛ Лимасол – Нидеркорн (1:0)

Домжале – Валур (2:1)

Лех Познањ – Хаугесунд (2:3)

Скендербег – Каират (1:1)

Црвена звезда – Иртиш (1:1)

Јагиелонија – Габала (1:1)

Младост Подгорица – Штурм (1:0)

Горица – Паниониос (0:2)

Широки Брег – Абердин (1:1)

Видеотон – Калју (3:0)

Рејкјавик – Макаби Тел Авив (1:3)

Во заграда се резултати од првите средби